01 Географиялык жайгашуусу

Кашка-Суу айыл өкмөтү Кыргыз Республикасынын борбору Бишкек шаарынан 850 чакырым, Ош облусунун борборунан 238 чакырым, ал эми Чоң-Алай районунун борборунан 45 чакырым алыстыкта жайгашкан.

Аймак бийик тоолуу жана шарты катаал аймактардын катарына кирет. Кыш мезгили жети айга чейин созулуп, аба ырайынын кескин өзгөрүүлөрү байкалат.

02 Жердин рельефи

Чоң-Алай өрөөнүндө жаңы тектоникалык кыймылдар жана экзогендик процесстер, төртүнчүлүк мезгилдеги муз каптоо, дарыялар, аяздуу суук жана температуралык процесстер рельефти түзүүчү негизги факторлор болуп саналат.

Чоң-Алай өрөөнүнүн аймагында рельефтин эки геоморфологиялык аймагы, төрт геоморфологиялык комплекси жана тогуз тиби ажыратылган. Кашка-Суу айыл аймагынын жайыттарынын жалпы аянты 72 417 гектарды түзөт.

03 Климаттык шарттары

Чоң-Алай өрөөнүнүн климаты континенттик жана кургак. Жыл мезгилдери бири-биринен кескин айырмаланат. Аймактын деңиз деңгээлинен бийик жайгашуусу булуттуулукка, жаан-чачынга, ошондой эле абанын жылдык жана суткалык температурасынын өзгөрүшүнө олуттуу таасир берет.

Жаан-чачындын аз болушуна жана аймактагы нымдуулуктун төмөн деңгээлине батыштан тынымсыз соккон шамалдар да чоң таасирин тийгизет.

04 Чектеш аймактар

Кашка-Суу айыл аймагы батыш тарабынан Чоң-Алай айыл аймагы, ал эми чыгыш тарабынан Алай району менен чектешет.